Recoñecen ante o xuíz terse causado lesións nunha pelexa iniciada á saída dunha panadería
Por Redacción
Marcos M. C. e Juan Pablo N.V. recoñeceron ante o xuíz da sección segunda da Audiencia de Pontevedra os feitos que se lles imputaban en relación a un enfrontamento entre ambos que tiña lugar o 13 de decembro de 2014 cando ambos coincidían no interior dunha panadería-cafetería no centro urbano de Pontevedra.
Ambos saíron e na rúa iniciaron unha forte discusión ata o punto de que comezaron a empuxarse mutuamente. Juan Pablo propinou un puñazo no ombreiro esquerdo a Marcos, que respondeu asestando varias trompadas ao seu adversario na boca e na cara.
Os dous caeron ao chan nunha zona axardinada. Juan Pablo quedou encima de Marcos e apertoulle o pescozo ata que este conseguía poñerlle a man na cara e levarlla cara a un dos seus ombreiros, facendo forza contra el cos pés. Lograba poñerse de pé e, segundo o escrito de Fiscalía, aproveitaba que Juan Pablo estaba aínda de xeonllos no chan para poñerlle o xeonllo nas costas do seu opoñente ata que un veciño que pasaba naquel momento polo lugar logrou separalos.
O resultado deste enfrontamento foi que Juan Pablo sufriu numerosas policontusións, abrasións cutáneas, cervicalxia mecánica e mobilidade severa nos catro incisivos inferiores. Foi necesario extraerlle as catro pezas dentais e a colocación dunha ponte de cerámica, cunha curación de 30 días. Marcos tivo unha contusión no seu ombreiro esquerdo para a que necesitou asistencia facultativa.
Inicialmente o Ministerio Fiscal solicitaba unha pena dun ano e seis meses de prisión para Marcos por un delito de lesións mentres que para Juan Pablo establecíase unha falta de lesións. A fiscal rebaixaba a petición de condena para Marcos a un ano de prisión. Ambas partes chegaron a acordo e aceptaron as penas tras recoñecer os feitos ante o xuíz.