O can PI dará a coñecer aos alumnos de Campolongo os dereitos e obrigas dos donos de mascotas
Por Redacción
A Xunta de Galicia poñerá en marcha este xoves un conxunto de actividades educativas coas que se pretende lograr o compromiso e a implicación do alumnado do CEIP Campolongo de Pontevedra na conservación da natureza e na tenza de animais domésticos. Os proxectos educativos desenvolveranse no marco do Día Mundial da Educación Ambiental para os alumnos de segundo de Primaria.
As actividades teñen o obxectivo de promover unha toma de conciencia crítica e sensible respecto do ambiente e a súa incidencia na calidade de vida.
Unha delas servirá para introducir conceptos básicos sobre a conservación da natureza e outra será unha experiencia piloto que, mediante a creación do personaxe dun can, lles permitirá coñecer os dereitos e as obrigas dos propietarios de animais domésticos.
Esta última actividade leva por título Un conto para PI, sendo este último o nome do can que explicará aos pequenos as medidas hixiénico-sanitarias que serán necesario adoptar e o trato que deberán recibir os animais domésticos para garantir a súa calidade de vida e os efectos beneficiosos que poden ter nos seus coidadores.
A actividade Un conto para PI consta de tres partes: primeiro, a presentación do personaxe e o relato sobre a responsabilidade que implica a tenza dos animais domésticos; segundo, a lectura entre todos os nenos dun conto dedicado a PI e, por último, a creación dun relato cuxo protagonista será o can e que formará parte dun gran libro de contos que podería difundirse entre os centros educativos.