Os bombeiros excarceran un condutor que se estrelou contra un poste da luz ás 5 da mañá en Alba
Por Redacción
Os bombeiros do Parque de Pontevedra tiveron que intervir na madrugada deste domingo 22 de xaneiro ao ser alertados polo servizo de Emerxencias do 112 dun accidente sufrido por un mozo ao impactar o seu vehículo cun poste da luz na estrada da parroquia pontevedresa de Alba, na contorna da conexión deste viario que se dirixe a Santiago coa estrada de Vilagarcía.
Inicialmente, o impacto non parecía grave, pero a Garda Civil de Tráfico alertou da necesidade dun equipo dos bombeiros para excarcerar o condutor para que puidese saír do vehículo.
Segundo informaron os bombeiros de Pontevedra, unha unidade desprazouse ata a zona ao redor das 05.00 horas e foi necesario retirar a porta do vehículo e o poste contra o que impactara para extraer ao mozo, que viaxaba só.
O condutor foi trasladado a un centro hospitalario de Pontevedra.