Ponte Caldelas mantén aberta a matrícula do curso de preparación para obter o título da ESO
Por Redacción
Preto de vinte veciños de Ponte Caldelas comezaron esta semana o curso de capacitación ara obter o título de graduado en Ensino Secundario Obrigatorio (ESO), que ofrece o Concello. O curso contempla case cinco meses de actividade formativa e desenvolverase ata o próximo mes de maio, datan na que están previstos os exames oficiais.
A actividade é gratuíta e está programada para que os estudantes poidan adquirir os coñecementos necesarios para superar eses exames e obter o título. A maioría de asistentes son mozos que abandonaron os seus estudos, pero tamén acoden persoas de idade máis avanzada co obxectivo de aproveitar esta oportunidade para obter o título oficial para optar a novas posibilidades laborais e formativas.
Os ámbitos de formación que se ofrecen son o Científico, Comunicación e Social, os mesmo nos que se estrutura o exame. As clases impártense os luns, mércores e venres, en horario de mañá, de 10.00 a 13.00 horas no Centro Cultural de Ponte Caldelas.
O Concello manterá aberto o prazo de matrícula durante varios días máis. Os interesados poden chamar en horario de oficina ás oficinas municipais a través do 986.750.013.