Un home de 48 anos, primeiro detido de 2017 por violencia de xénero en Pontevedra
Por Redacción
Apenas unhas horas pasaran das doce badaladas cando se producía en Pontevedra a primeira detención dun home como presunto autor dun delito de violencia de xénero. Trátase dun pontevedrés de 48 anos, que foi detido por axentes da Policía Local despois de esnaquizar o mobiliario da casa de súa ex parella e tratar de agredila.
Os feitos, segundo informou a Policía Local, ocorreron ás 3.30 horas da madrugada do 1 de xaneiro. Os axentes acudiron á vivenda da muller despois de que un veciño alertara dos gritos e dos golpes que se estaban a producir dentro da casa.
Cando chegaron ao lugar, o home trataba xa de saír do edificio. Foi identificado como a persoa que estaba causando os estragos no domicilio da vítima, por lo que foi retido ata que os axentes puideron verificar a denuncia.
No interior da vivenda atopábase a muller que fora vítima dos presuntos malos tratos. Tanto ela como as testemuñas dos feitos ratificaron que o home presentárase na casa da súa ex parella, que estaba celebrando a festa de fin de ano cuns amigos.
Segundo o seu relato, o home entrara no piso moi alterado e de inmediato procedeu a buscar a súa ex parella, intentando abalanzarse sobre ela con intención de agredila. Impediuno o grupo de persoas que se atopaban no interior da vivenda, suxeitando ao agresor e trasladando á muller a unha habitación coa fin de protexela.
O agresor comezou a golpear o mobiliario da vivenda e posteriormente dirixiuse ata a habitación onde se atopaba a muller. Tras golpear e romper o cristal da porta, accedeu ao interior do cuarto e intentou agredila de novo, sendo rescatada e protexida polos seus amigos que a sacaron da casa e levárona ata o domicilio dun veciño.
Por estes feitos, avalados polas testemuñas presentes, os axentes da Policía Local procederon á detención do agresor, que pasará nas próximas horas a disposición xudicial.
Relacionadas:
-
Detido un home de 46 anos por agredir a súa ex parella nun bar da zona monumental
Por Redacción |
-
Detido un mozo por pegar á súa parella diante dos fillos, de curta idade
Por Redacción |
-
Detido un home en Pontevedra como presunto autor de violencia machista e de roubo dunha pensión
Por Redacción |
-
Atropela unha muller, dáse á fuga, dá positivo en alcol e acaba detido por violencia de xénero
Por Natalia Puga |