Pontevedrada 2016

A Pontevedrada, candidata aos premios Cidade de Pontevedra

Por Alejandro Espiño
Sábado 24 de Decembro, 2016 ás 14:17 do Sábado 24 de Decembro, 2016

Un ano máis, a Pontevedrada volve ser candidata aos premios Cidade de Pontevedra. Esta asociación que, entre outras cuestións, organiza un dos eventos solidarios máis importantes dos que se celebra en Pontevedra, optará ao galardón na categoría de persoas xurídicas.

Foi a asociación Asseii a que propuxo á Asociación de Amigos da Pontevedrada (Asampo) a estes premios e anima a que particulares e colectivos apoien esta proposta coa súa firma.

A principal actividade da Pontevedrada é a organización dunha marcha nocturna ininterrompida de aproximadamente 63 quilómetros que transcorre polo Camiño de Santiago Portugués desde a cidade do Lérez ata Santiago de Compostela.

Con ela, pretenden concienciar á poboación da gran importancia que ten a doazón altruísta de sangue, órganos e tecidos.

A este esforzo dedican ademais numerosas actividades ao longo do ano.

Os premios Cidade de Pontevedra entregaranse o 20 de xaneiro, día de San Sebastián, no Teatro Principal.