Alta participación na novena edición do Concerto Quilo Solidario
Por Redacción
O pavillón municipal de Ponte Caldelas acolleu este sábado a novena edición do Concerto Quilo Solidario, co que se recadaron varias toneladas de alimentos non perecedoiros.
O evento foi un éxito de público, xa que o Concello calcula que a asistencia roldou os 600 espectadores, tendo en conta que se habilitaron medio milleiro de cadeiras que non chegaron a cubrir a demanda, obrigando a algúns veciños para seguir as actuacións de pé.
O equipo organizador, encabezado pola banda de gaitas e baile Os Coribantes, entregará nos próximos días todo o recadado a Cáritas, que o ano pasado atendeu a 43 familias da zona en risco de exclusión social.
Foron máis de dúas horas de música en directo, desde as 21:00 horas da noite, coa participación das Maianas, Laranxada de Limón, Os Coribantes, algúns compoñentes da Roda e a actuación de Queimán e Andrea Pousa.