Chuvias intensas que irán desaparecendo cara a fin de semana
Por Redacción
O aire frío permanecerá sobre Galicia durante este xoves 24, cun centro de baixas presións que deixará unha xornada de moita inestabilidade atmosférica, segundo a información facilitada polo servizo de Meteogalicia. Os ceos estarán cubertos con choivas xeneralizadas máis intensas no litoral onde poderán ter carácter tormentoso. A medida que vaia avanzando a tarde, as choivas irán remitindo polo norte. A cota de neve sitúase ao redor dos 1.200 metros pola mañá baixando a 1.000 metros pola tarde. As temperaturas mínimas experimentarán un lixeiro ascenso, mentres que as máximas manteranse sen cambios situándose entre os 4 e os 12 graos. O vento soprará forte do oeste durante a mañá, tendendo a variar en dirección norte e leste ao longo da tarde.
As Rías Baixas atoparanse durante a xornada do venres 25 nunha zona intermedia con baixas presións movéndose cara ao sur da península e o anticiclón sobre as illas Británicas. Os ceos permanecerán máis nubrados na provincia de Pontevedra, con chuvascos durante a mañá, que serán de neve por encima dos 1.000 metros. O vento soprará de compoñente este moderado, con intervalos fortes a moi fortes no litroral oeste en zonas altas de Pontevedra durante a mañá. As temperaturas ascenderan lixeiramente, establecéndose entre os 7 e os 11 graos.
O sábado, a borrasca centrada sobre o sur de Portugal seguirá influendo sobre as Rías Baixas. Os ceos mostraranse máis nubrados no sur da provincia, coa posibilidade dalgún chuvasco illado. As temperaturas non experimentarán cambios significativos, quedando entre os 8 e os 13 graos. Os ventos soprarán do norte frouxos.
A partir do domingo, Galicia continuará marcada por unha situación intermedia entre altas e baixas presións con aire frío procedente do Atlántico Norte. O ceo atoparase parcialmente nubrado. As temperaturas situaranse entre os 9 e os 17 graos, sobre todo a partir do martes coa chegada de novas borrascas procedentes do Atlántico.