Falece unha moza de Vilagarcía en Cedeira ao caer o balcón ao que saíra a fumar
Por Redacción
Un tráxico suceso ocorrido en Cedeira acabou coa vida dunha moza de Vilagarcía de Arousa de 33 anos. Faleceu tras esborrallarse parte do balcón da vivenda na que se atopaba e ao que saíra a fumar e conversar cunha amiga.
O suceso produciuse este domingo, ao redor das sete da tarde, nun edificio situado na rúa Estrada, no centro urbano da localidade.
Segundo informaron os servizos de emerxencia, o sinistro tivo lugar ao ceder a balaustrada na que estaban apoiadas.
A súa compañeira resultou ilesa ao non caer ao baleiro desde o balcón e poder regresar ao interior da vivenda, onde se atopaba un grupo de amigos.
As autoridades investigan agora por que esborrallou a estrutura dun edificio relativamente novo, construído hai apenas sete anos. Os bombeiros revisaron os demais balcóns e botaron abaixo o do primeiro piso, xa que tamén estaba "solta", mentres que a do terceiro estaba "en mellor estado".
No operativo de emerxencia participaron, tras o aviso do 112, efectivos da Garda Civil, a Policía Local de Cedeira e o parque de bombeiros de Ferrol.