Tres persoas feridas en dous accidentes de tráfico en Cambados e Vilagarcía
Por Redacción
Foi unha tarde accidentada a que se viviu nas estradas da comarca do Salnés. Tres persoas resultaron feridas en dous accidentes de tráfico que se produciron nos municipios de Cambados e Vilagarcía de Arousa.
O primeiro deles tivo lugar na intersección entre a Rúa Hospital e a Avenida de Galicia de Cambados.
Dúas persoas resultaron feridas nunha colisión entre un turismo e unha furgoneta. Segundo o 112, a pesar de que foron trasladadas ao Hospital do Salnés, o seu estado non reviste gravidade. Ambos os feridos viaxaban no coche, un Opel Corsa, e queixábanse de dores cervicais e lumbares. O condutor da furgoneta resultou ileso.
Desde o Centro de Atención ás Emerxencias mobilizouse aos Bombeiros do Salnés, a Protección Civil e á Policía Local.
Pola súa banda, os efectivos de emerxencia tiveron que empregarse a fondo na liberación dunha persoa que quedou atrapada no interior do seu vehículo tras impactar contra outra furgoneta en Vilagarcía, concretamente no quilómetro 5 da VG-4.3, en sentido Cambados.
O home que tivo ser rescatado tiña un nocello roto e diversas contusións na cara, mentres que as dúas persoas que viaxaban no outro vehículo resultaron ilesas.
O 112 Galicia recibiu a alerta de Urxencias Médicas ás 17:45 horas desta tarde, tras o cal informouse aos Bombeiros do Salnés, que se desprazaron ao lugar cun equipo de excarceración. Tamén se alertou ao Servizo Municipal de Emerxencias de Vilagarcía e á Garda Civil de Tráfico.