O Concello e a Xunta buscan coordinar os servizos de Emerxencias
Por Redacción
A concelleira de Protección Cidudadana, Carme da Silva e o xefe da área de Protección Civil de Pontevedra da Xunta, Alejandro Medeiros coincidían este mediodía nas instalacións da Agrupación Local de Protección Civil nos baixos do Estadio de Pasarón.
Alí trataron un dos temas pendentes para mellorar o funcionamento nas intervencións de emerxencia, a través da coordinación dos servizos dependentes tanto da Xunta como do Concello para ofrecer unha resposta rápida e de calidade a situacións nas que podería producirse dúbidas sobre a quen lle corresponde intervir en determinados casos.
Neste sentido, entenden que deben atenderse os criterios profesionais para establecer un protocolo de actuación segundo o suceso en que se teña que actuar.
Á reunión asistiron o xefe da Agrupación de Protección Civil, Hermenegildo Novoa e o novo xefe dos Bombeiros, Miguel Estévez. A concelleira Carme da Silva indicou que as xefaturas da Policía Local e dos Bombeiros en colaboración cos responsables de Protección Civil de Pontevedra atópanse traballando na elaboración dun protocolo de intervención e actuación dos servizos de emerxencia.
A Agrupación de Protección Civil de Pontevedra está formada, na actualidade, por corenta voluntarios e o seu financiamento depende exclusivamente do Concello de Pontevedra.