Boa Vida apela á "forza solidaria" do Nadal
Por Redacción
A Asociación Boa Vida presentou á cidadanía e aos medios de comunicación a campaña "Boa Vida é Nadal" coa que estarán presentes durante este mes nas rúas e fogares de Pontevedra.
Parten da idea de que o Nadal ten unha "forza solidaria" que anima a compartir e ilusionarse por unha vida mellor, por iso solicitan á cidadanía pontevedresa que acheguen á asociación aqueles artigos que xa non precisan, tales como roupa, calzado, bisutería, ou libros.
A Universidade de Vigo, a través do alumnado, apoia esta campaña facilitando a colocación dun colector cedido pola sastrería Tres Rías da Rúa Real durante 15 días nas súas instalacións.
Boa Vida tamén fai un chamamento á cidadanía para que merquen os seus agasallos e lotaría de Nadal na tenda solidaria, situada na rúa Cruz Roja, número 16. A tenda, coa que a asociación mostra o seu compromiso social tanto coas persoas como co medio ambiente está aberta entre as 10 e ás 13.30 e as 15 e 20 horas.
E finalmente piden aos pontevedreses que incorporen á súa carta dos Reis Magos as peticións de Boa Vida, que poderán atopar nas redes sociais e nas reflexións que a cafetería Savoy fará chegar aos seus clientes cos cafés durante a campaña "Boa Vida é Nadal".
Nesta terceira campaña de Nadal, a asociación pretende recoller 3.500 quilos de roupa e calzado durante o mes de decembro e vender na tenda 6.000 euros, que lle permitirián manter as bolsas de formación e incorporar novos bolseiros.
Estes obxectivos que poden parecer modestos, son os necesarios para continuar co traballo iniciado pola asociación no 2010 e dar pasos para que o que foi un soño, siga facéndose realidade: non renderse e traballar para saír da pobreza.
Durante o último ano, teñen colaborado na formación e xeración de ingresos de máis de seis familias, e informado e acompañado a 200 persoas que con estas accións se activan para levar unha vida mellor e buscar e atopar traballo.