Un incendio calcina un galpón cheo de chatarra na Canicouva
Por Redacción
Efectivos do Corpo de Bombeiros e a Policía Local de Pontevedra acudiron na mañá deste xoves á parroquia da Canicouva para sufocar un incendio iniciado no interior dun galpón moi próximo a unha vivenda habitada. As chamas tan só afectaron á construción na que se iniciaron, pero deixárona totalmente calcinada.
O galpón afectado estaba cheo de chatarra procedente de coches e motos e de distinto tipo de electrodomésticos, como lavadoras ou frigoríficos. Todos os efectos que había no interior quedaron esnaquizados e a estrutura, calcinada.
O galpón está pegada a unha vivenda e nunha zona de difícil acceso, de modo que o camión dos bombeiros non puido chegar xusto ao pé da construción, senón que quedou aparcado a varios metros e os profesionais apagaron as chamas utilizando unha mangueira longa.
Segundo informaron os Bombeiros de Pontevedra, o aviso recibiuse sobre as 7.50 horas deste xoves e foi necesario que desprazasen ao lugar, no centro da Canicouva, unha dotación. Ademais, tamén se mobilizaron efectivos das policías Local e Nacional. Dúas horas despois, sobre as 9.50, a intervención deuse por pechada e regresaron ao parque.