O IX Concerto Kilo Solidario en Ponte Caldelas quere recadar catro toneladas de alimentos
Por Redacción
O Pavillón de Ponte Caldelas acollerá o sábado 26 de novembro ás 20.30 horas a novena edición do Concerto Kilo Solidario. Trátase dun evento co que se pretende obter ao redor de catro toneladas de alimentos non perecedoiros, que se cederán a Cáritas para axudar a aquelas persoas que se atopan en situación de necesidade no municipio.
O festival atópase organizado pola banda de gaitas e baile Os Coribantes en colaboración co Concello e coa axuda da Deputación Proivncial. Durante a pasada edición lográronse preto de catro toneladas, que permitiron atender a 43 familias en risco de exclusión social en colaboración co Banco de Alimentos.
Recoméndase a entrega de paquetes de produtos non perecedoiros na entrada ao recinto ou nos supermercados Froiz e Día do municipio. A organización recomenda que se evite a entrega de arroz, produto que se atopa en stock nos locais do Banco de Alimentos. As existencias de legumes, fariña ou pasta son máis escasas.
O primeiras sete edicións celebráronse en Pontevedra para entregar os alimentos ao comedor de San Francisco pero o goberno de Andrés Díaz decidiu recuperalo para Ponte Caldelas.
Neste IX Concerto Lilo Solidario actuarán As Maianas, Laranxada de Limón, Os Coribantes, compoñentes da Roda, Queimán e Andrea Pousa.