O Concello de Sanxenxo detecta "descontrol" nas pólizas dos seguros municipais
Por Redacción
O goberno local de Sanxenxo decidiu sacar a contratación as pólizas de seguros en distintos ramos para garantir os riscos e continxencias derivadas á actividade do Concello ou do organismo autónomo Terra de Sanxenxo.
A elaboración dun prego de cláusulas administrativas busca unificar e regularizar unha situación que acumulaba numerosos reparos suspensivos por parte dos servizos municipais de intervención.
Trátase da primeira vez, segundo apunta o goberno de Gonzalo Pita, que este servizo sae a contratación. Contrataranse as pólizas para todos os vehículos municipais na totalidade das categorías, desde furgonetas a tractores pasando polos automóbiles da Policía local e do Servizo de Emerxencias. O segundo bloque ten que ver cun seguro multi risco para dar cobertura aos edificios municipais. A terceira contratación cubrirá a responsabilidade civil da administración local.
Esta contratación leva a cabo porque o goberno de Sanxenxo detectou a falta de seguimento da maioría das pólizas subscritas pola administración local, ademais de descontrol coa renovación sistemática de seguros innecesarios. Denuncian que se renovou a cobertura dos voluntarios de Protección Civil, a pesar de que esta figura desapareceu en Sanxenxo hai varios anos.
Tamén se detectaron pólizas duplicadas que daban dobre cobertura a edificios municipais como o situado en Rafael Picó, en Portonovo. Por exemplo, tamén se destaca que un tractor municipal, avariado en 2014 e sen estar en circulación desde entón conta cunha póliza.
Desde o goberno de Gonzalo Pita denúnciase que este traballo dependía do anterior concelleiro de Economía, Marcos Guisasola, pertencente ao PP.
O contrato de seguros farase por un período de dous anos que comezarán a contar o próximo 1 de xaneiro e con prezo de licitación de 90.500 euros para o primeiro exercicio e de 95.000 euros para o segundo.