Segue a festa que mete medo
Por Redacción
Creada e actualizada
Creada e actualizada
Os festexos vencellados ao Samaín comezaron este venres nos centros escolares de Pontevedra e a súa comarca e continuarán durante toda a fin de semana e a ponte festiva en centros sociais, vivendas particulares e negocios. Despois da galería con celebracións publicada este venres cos primeiros actos, este sábado continuamos a recoller actividades.
Na parroquia pontevedresa de Ponte Sampaio, os nenos do colexio público celebraron este venres a 'Festa do Medo'. Primeiro foi o turno dun concurso de cabazas e a continuación a celebración do Samaín propiamente dita, que comezou cun 'túnel do medo' polo que os escolares ían pasando a escuras e atopándose pantasmas, monstros e esqueletes ao longo do percorrido.
Unha vez superado este túnel, polo que moitos alumnos de Educación Infantil non foron quen de pasar polo medo que lles daba, houbo un pequeno festival con esconxuro incluído. Durante a festa, os nenos amosaron as súas capacidades idiomáticas con cancións e bailes en galego, castelán e inglés e lendo os textos gañadores do concurso de contos de medo que se celebrou no colexio. O broche final chegou cunha canción colectiva adicada ao 'Morcego Ramiro'.
Na ludoteca das escolas deportivas de Poio tamén houbo celebración na tarde deste venres. Os nenos que asisten á ludoteca gozaron dunha gran festa do Samaín nas instalacións do recinto do colexio Isidora Riestra na Seca con disfraces, presentación de cabazas e merendola con comidas monstruosas.
Ademais da tradición galega do Samaín, nestes días tamén se están vivindo en Pontevedra celebracións máis vinculadas ao Halloween anglosaxón que se festexa na mesma época. É o caso da actividade organizada este sábado no Gothic Circus School da cidade, un taller impartido por Wedy Rodrígues, de Scaravello Studio FX, e Rebeca Santos que ensinou a nenos e adultos a maquillarse para a ocasión e, de paso, realizou un taller de fotos aéreas cos terroríficos personaxes 'voando' polo aire do centro.