A Lama non cobrará aos veciños os recibos do IBI inferiores a 12 euros
Por Redacción
O pleno extraordinario da corporación da Lama aprobou a modificación da ordenanza de cobro do Imposto de Bens Inmobles (IBI). Este cambio supón que deixará de cobrar os recibos por cantidades inferiores a 12 euros e bonificarase cun 50% de desconto deste imposto a aquelas propiedades pertencentes ás familias numerosas empadroadas no municipio.
A proposta saíu aprobada co voto favorable do PPdeG e de Cidadáns. O PSOE abstívose ao considerar que a súa proposta consistente en aplicar unha exención do imposto nun 90, 60 ó 30% en función de se a leira urbana carecía de servizos básicos como iluminación pública, rede de sumidoiros ou abastecemento de auga non foi aceptada. Os socialistas tamén xustificaron a súa abstención en que a interventora entende que será unha decisión lesiva para as arcas municipais, que deixarán de cobrar ao redor de 6.470 recibos.
O alcalde Jorge Canda entende que esta medida supoñerá un beneficio para un maior número de veciños, mentres non conten cun Plan Xeral de Ordenación Urbana e non se eliminen as zonas de tolerancia que son, segundo apuntou, as que están a causar estes problemas.
O pleno aprobou por unanimidade a proposta do alcalde de solicitarlle á Consellería de Educación a desafectación da coñecida como "Casa do Conserxe" para destinala a usos relacionados coa atención á infancia e convertela nunha "Casa Neno".
Tamén se aprobou por unanimidade o cambio dunha subvención nominativa á comunidade de Montes de Antas de 7.000 euros que, en principio, ía destinarse a arranxos na Casa do Pobo, pero que os veciños prefiren destinar a traballos de limpeza e en prevención de incendios.