O Concello de Ponte Caldelas e a coral Valdarrosa organizan clases de piano, guitarra e canto coral
Por Redacción
As persoas interesadas en adquirir unha primeira formación musical poden aproveitar a oportunidade do curso que organizan conxuntamente o Concello de Ponte Caldelas e a coral Valdarrosa. Neste mes de outubro comezan os cursos de Piano e Guitarra, que se van prolongar ata o mes de maio.
Para participar tan só é necesario pasarse polas oficinas municipais, en horario de 9 a 14 horas, e presentar o DNI e unha conta bancaria onde domiciliar a tarifa de 15 euros mensuais. O programa inclúe bonificacións familiares que reducen progresivamente a cota en caso de inscrición de máis persoas dunha misma familia, ata o punto de que se se inscriben catro familiares aboan 35 euros ao mes. As bonificacións só se aplican a persoas empadroadas en Ponte Caldelas.
As clases, que se imparten os luns na Casa da Cultura, teñen unha duración dunha hora. Están a cargo de profesorado titulado. Ata o momento xa están anotadas unhas 15 persoas, polo que os interesados deben darse présa.
Por outra banda, as clases abranguen tamén o canto coral. Neste caso, a actividade é completamente gratuíta, e consiste en dúas horas á semana. Hai máis dunha vintena de persoas participando nesta actividade coral que se desenvolve, ininterrumpidamente, durante todo o ano.
O alcalde, Andrés Díaz, subliña o papel de dinamizador cultural do municipio que está a desenvolver a coral Valdarrosa, sen cuxa colaboración a organización destas clases de música sería máis custosa e complexa.