"O mundo susténtase nunha débeda social coas mulleres"
Por Redacción
Aínda que, "na nosa sociedade a idea de traballo asimilouse a emprego", existen, como sinala a profesora da Universitat de Barcelona Cristina Carrasco, outros moitos tipos de traballo máis aló do mercado laboral, como todo aquel vinculado co ámbito doméstico ou co coidado das persoas.
Historicamente estes traballos foron realizados de forma maioritaria polas mulleres, que, ao asumir, máis aló da súa traxectoria profesional, esa "gran cantidade de traballo que require unha sociedade para poder subsistir, estamos sostendo o mundo, a vida", como lembrou Carrasco Bengoa.
O Diario da Universidade de Vigo recolle a conferencia de apertura do segundo ciclo Unha mirada de xénero, Cristina Carrasco puxo o acento na "débeda social que o sistema capitalista e a sociedade patriarcal teñen coas mulleres", por un labor "espoliado polo sistema capitalista", xa que sen el, o mercado laboral non podería contar "coa forza de traballo que precisa, criada e educada".
Carrasco puxo de relevo a idea do economista Kenneth Boulding de que existen "moitos traballos e accións que se fan por amor, pero tamén por temor". Nesa dualidade atoparíanse precisamente os labores domésticos e de coidado "que as mulleres, e tamén os homes, fan en gran parte por amor", pero que levan implícita tamén esa idea de temor, "de presión social", que neste caso só afectaría ás mulleres, "porque é o rol que nos tocou", como denunciou esta investigadora.
Nese punto, esta docente do Departamento de Teoría Económica da Universitat de Barcelona puxo de relevo que "non se pide que se salde esa débeda, senón que deixe de existir esa situación", o que fai preciso en primeiro momento "facela visible, amosar como está funcionando o mundo", para a partires de aí, promover accións que permitan "dalgunha maneira reorganizarnos os traballos dunha forma equitativa".