O embaixador de Chile en España visita Bueu e interésase polo modelo de casas rurais
Por Redacción
Francisco Marambio, actual embaixador de Chile en España, está a pasar uns días hospedado nunha casa rural do municipio de Bueu e non quixo perder a ocasión de entrevistarse co alcalde da vila, Félix Juncal, xunto o que explorou a relación entre ambos os dous países e as posibilidades de colaboración en proxectos económicos.
Así, o diplomático chileno aproveitou estes días para reunirse con autoridades e coñecer a gastronomía mariñeira e declarou que o modelo das casas rurais españolas "está moi ben explotado e deberíamos levalo a Chile".
Durante este mércores, Marambio mantivo unha xuntanza de traballo con Juncal e varios concelleiros do seu goberno municipal, Silvia Carballo, José Cuervo e Fidel Castro.
O embaixador mostrouse moi contento por esta recepción, ao remate da cal o rexedor buenense aproveitou para agasallalo cun faro de Ons e unha bandeira da vila, ademais de libros e discos musicais, detalle que agradeceu especialmente o embaixador.
Correspondendo ao xesto, o alcalde recibiu unha medalla de edición limitada coa lembranza do Nitrato de Chile, elemento que se atopa na memoria histórica do país.
Tras o acto, o alcalde mostrouse orgulloso de que na vila morracense recalen autoridades de todo o mundo, o que mostra a boa saúde do turismo, que este verán medrou arredor dun 20% con respecto o ano anterior.