Detido un home en moto que circulaba borracho e armado cunha pistola por Pontevedra
Por Redacción
En moto polo centro de Pontevedra, borracho e armado cunha pistola cargada e cun punzón de grandes dimensións. Así sorprenderon dous axentes da Policía Nacional a un home de 50 anos, veciño de Marín, a pasada fin de semana.
Está acusado dun delito contra a seguridade do tráfico, desobediencia grave e tenencia ilícita de armas.
Segundo informou a comisaría de Pontevedra, o suceso produciuse sobre as tres da madrugada do pasado 1 de outubro -do sábado ao domingo-.
Os axentes sorprenderon o motorista cando circulaba a gran velocidade pola rúa Michelena poñendo en "grave risco", segundo a Policía, a integridade dos peóns que a esas horas atopábanse na zona.
O home non atendeu ás indicacións que lle fixeron os axentes para que se detivese e fuxiu polo centro histórico pontevedrés, sendo interceptado na rúa Real.
Durante o cacheo que lle realizaron os policías, se lle requisou unha pistola curta do calibre 8mm que se atopaba cargada coa súa munición correspondente e un punzón feito de forma artesanal, afiado na punta e duns 18 centímetros de lonxitude.
Ademais, o detido deu positivo na proba de alcoholemia practicada pola Policía Local ao arroxar un resultado de 0.89 mg/l, case catro veces máis do permitido.
O home, unha vez tramitado o correspondente atestado policial, foi posto a disposición da autoridade xudicial.