Bueu acondicionará as zonas verdes coa colaboración dos técnicos do Areeiro
Por Redacción
O alcalde de Bueu, Félix Juncal, recibiu este venres a visita dos deputados Xosé Leal e Eva Vilaverde e do persoal da Estación Fitopatolóxica do Areeiro para coñecer de preto as necesidades da vila no que atinxe a xardíns e especies arbóreas e preparar un proxecto de colaboración no acondicionamento de zonas verdes.
A idea que barallan desde o ente provincial é racionalizar os recursos do Areeiro e por iso, tal e como destacou a deputada Eva Vilaverde, se van entregar un máximo de cincuenta plantas para acondicionar os espazos públicos e habilitar novas áreas.
Durante a visita deste venres exploráronse algúns dos espazos e zonas verdes máis relevantes do municipio, como a Praza Massó, a urbanización Massó ou o parque María Eugenia. Ademais, o alcalde aproveitou a ocasión para agradecer a boa disposición da Deputación, á que lle presentou o proxecto de axardinamento do Cemiterio Vello, que se agarda acometer no vindeiro ano, buscando esa liña de colaboración coa Deputación.
A visita serviu tamén para afondar nas diferentes técnicas de poda das especies arbóreas, establecéndose pautas para o mellor coidado e mantemento. Así, o Concello vai agardar ata que remate a caída da folla das árbores para comezar coa poda, e que así non se interrompa o ciclo vital, tal e como aconsellaron os técnicos. No caso concreto do piñeiro sito no porto de Bueu, o persoal do areeiro comprometeuse a recoller este venres unha mostraxe de terra e pólas para saber cal é a patoloxía e a orixe do seu mal estado.
COMEZO DAS OBRAS DO CAMIÑO DE CHANS
Por outra banda, os concelleiros Fidel Castro e Silvia Carballo visitaron hoxe as obras de rehabilitación do Camiño entre A Pena e a Área Recreativa de Chans, que comezaron este mércores e que están sendo realizadas pola empresa Marconsa. A actuación, con cargo á subvención de 75.243,67 euros do Plan Marco da Axencia Galega de Desenvolvemento Rural, inclúe as obras de limpeza de cunetas e o asfaltado, para así eliminar as diversas fochas presentes nela.