Sacan a concurso unha cafetería-restaurante no porto de Marín
Por Redacción
A Autoridade Portuaria de Marín e Ría de Pontevedra decidiu sacar a concurso público a concesión dunha cafetería-restaurante nun local de máis de 400 metros cadrados dotado de almacén, cociña e baños no porto.
A decisión de convocar o concurso e os pregos de base e de explotación da concesión adoptouna este xoves o Consello de Administración da Autoridade Portuaria, segundo informou a través dun comunicado.
Os conselleiros tamén coñeceron os últimos datos de movemento de mercadorías no Porto que ata o mes de agosto rexistra preto dun 4% de subida con respecto ao mesmo período do ano anterior. Por grupos de mercadorías, o incremento dáse tanto nos graneis sólidos como na mercadoría xeral.
Ademais, a pesca fresca continúa un ano máis mantendo unha tendencia positiva, cun incremento do 22% con respecto ao exercicio pasado. O número de buques tamén sobe, así como a súa capacidade.