Barro comeza unha recompilación de fotografías para realizar a exposición "Imaxes no Tempo"
Por Redacción
Coa finalidade de mostrar os cambios que tiveron lugar na sociedade nos últimos anos, e máis concretamente como estes afectaron o Concello de Barro, ponse en marcha a creación dun fondo que agrupa fotografías do municipio en diferentes eidos.
O fondo estará composto por calquera tipo de fotografías que reflictan actividades da vida cotiá, lugares do concello, festas, oficios, entre outras, tanto de agora como de antes.
Será a Oficina Municipal de Información Xuvenil (OMIX) de Barro a encargada de xuntar, custodiar e difundir este patrimonio documental e todos os interesados en participar neste proxecto poden entregar nela as fotografías, que serán dixitalizadas ao momento ou envíalas ao enderezo electrónico da OMIX (omix@barro.es). O dono das fotografías aportará a información da localización, ano, actividade que se está a realizar.
Todas esas fotografías formarán parte dunha exposición que sirva para visualizar esos cambios na vida, paisaxe e costumes ó longo do tempo.
Dende a OMIX coa colaboración da Asociación Peñaflor realizaranse unhas charlas nas que a veciñanza falará das súas vivencias reforzando así a información que as fotografías dan por si soas.