Os traballadores de ENCE ameazan con medidas de protesta para evitar o ERE
Por Redacción
O conselleiro delegado do Grupo Ence, Ignacio Colmenares, comunicou aos representantes dos traballadores que debido ao aumento de impostos e cambios legais nas tarifas de produción de enerxía eléctrica do Grupo, a empresa se ve obrigada a prescindir de 144 traballadores en toda España dun total de 1.000 mediante un ERE.
Non obstante, aínda non ofreceu datos do número de traballadores da fábrica de Pontevedra que se verían afectados dos actuais 350 empregados. Para o próximo martes 26 convocouse unha asemblea de traballadores en Lourizán para decidir se adoptan medidas de protesta en contra da aplicación deste ERE que se negociará no comité intercentros con representantes de cada unha das fábricas.
Dende o comité de ENCE recordan que esta decisión se adopta "a pesar de que o grupo declarou un aumento de beneficios o ano pasado dun 4% e tendo unha previsión para este ano de aumentar a produción tanto de enerxía eléctrica coma de celulosa.
Por este motivo, a intención do comité é a de propoñer protestas inmediatas, "sen descartar ningunha, por contundente que sexa, mentres a empresa non retire o ERE".