Licitan as obras de ampliación do IES Francisco Asorey de Cambados
Por Redacción
A Xunta de Galicia, a través da consellería de Cultura, Educación e Ordenación Universitaria publicou este martes a licitación das obras de ampliación do Instituto de Ensino Secundario Francisco Asorey, situado non concello de Cambados.
O orzamento para estes traballos ascende a 924.376 euros. Con esta intervención quérese actuar ante a necesidade que existe de escolarización e dotar de máis prazas de Formación Profesional.
As obras teñen como principal función acoller a Formación Profesional Básica e a adaptación dos ciclos profesionais a 2.000 horas. levarán a cabo distintas melloras nas instalacións de todo o centro educativo.
Segundo informa a Xunta, a obra iniciarase co estudo estrutural da edificación e a demolición dunha parte da cuberta actual para iniciar a construción de novos espazos destinados a aulas e a zonas polivalentes.
A ampliación contempla a construción de dúas aulas polivalentes, tres aulas taller e dúas aulas de desdobre, ademais de aseos adaptados para o profesorado e un almacén de limpeza.
Os traballos están cofinanciados polo Fondo Europeo de Desenvolvemento Rexional nun 80% dentro do programa Feder Galicia 2014-20.