Comeza a reparación do firme no Vial Norte, entre Campañó e o Mosteiro de Poio
Por Redacción
O xefe territorial de Infraestruturas e Vivenda en Pontevedra, José Luis Díez, visitou este xoves os traballos de reforzo do firme do Vial Norte, a estrada que conflúe no Mosteiro de Poio. Na visita técnica estivo acompañado polo xefe da Axencia de Infraestruturas en Pontevedra, Fausto Núñez.
Deste xeito, nas últimas horas a Xunta iniciaba estas obras nos tramos deteriorados da PO-535 e na VG-4.8. A solución elixida para executar esta reparación consiste no fresado da capa de rodaxe das zonas deformadas, coa súa posterior reposición.
O prazo de execución é de dous meses e afectará aos concellos de Poio e de Pontevedra, cun orzamento de 57.129 euros.
As obras de mellora levaranse a cabo entre os quilómetros 0 e 3+120 da estrada entre a parroquia pontevedresa de Campañó e o Mosteiro de Poio, así como entre os quilómetros 0 e 0+680 na PO-535, entre o Mosteiro de Poio e a parroquia de San Xoán.
Os traballos centraranse no fresada da capa de rodaxe dun espesor de 3 centímetros en todo o ancho do carril de circulación, en tramos como mínimo de 10 metros de lonxitude. Posteriormente, reporase o firme con aglomerado de mestura en quente descontinua, e se estenderá en zonas ocupando todo o carril completo entre as bandas lonxitudinais da pintura.
A superficie de actuación prevista é de 7.000 metros cadrados, é dicir, 2.000 metros lineais de carril. Nos tramos nos que se realice o estendido procederase a repintar toda a sinalización horizontal.