A Deputación inicia as emisións en ‘streaming’ dos seus actos institucionais
Por Redacción
A Deputación de Pontevedra comeza este mes as retransmisións en streaming, en directo a través da Internet, dos seus plenos e demais actos institucionais desenvolvidos nas dependencias provinciais.
Este venres farase unha proba a nivel interno para validar o seu bo funcionamento, a calidade de imaxe e de son. A primeira emisión pública para a cidadanía será o pleno que se celebrará o vindeiro venres 30 de setembro.
Foi o pasado mes de xullo cando se adxudicou, mediante resolución presidencial, a contratación de adquisición de material técnico especial necesario para a retransmisión en streaming dos plenos provinciais así como os diversos actos institucionais que se desenvolven nas dependencias provinciais.
Tres cámaras de vídeo HD dixital, un módulo de vídeo-gravación, unha unidade de codificación e streaming, un monitor de 20 polgadas… son só algúns dos elementos que integran os subministros outorgados por un importe de 15.450 euros.