Preto de 250 persoas participarán este sábado no primeiro Rastrexo de Sanxenxo
Por Redacción
Preto de 250 persoas, divididos en equipos integrados por entre 6 e 10 persoas, participarán este sábado no I Rastrexo organizado en Sanxenxo pola asociación O Cubreiro, que preside Juan Pintos, e a Concellería de Deportes que dirixe Jesús Sueiro.
Ambos se mostraron esta mañá satisfeitos co nivel de participación alcanzado nesta proba que, sen ser puramente deportiva, inclúe grandes doses de competitividade e rapidez.
Jesús Sueiro destaca a singularidade desta proba polo seu carácter nocturno, xa que se desenvolverá entre as 21.30 horas e a 1.30 da madrugada, partindo da Praza do Mar. A escuridade será un máis dos obstáculos que os participantes deberán superar, xa que dispoñerán da luz dunha lanterna para poder orientarse.
Probas de diferente índole, a desenvolver en ambientes máis rurais e tamén na praia, obrigarán aos deportistas para impoñerse un alto ritmo nos desprazamentos á vez que poñerán a proba a súa resistencia, a súa habilidade e a súa capacidade de convivencia, así como o seu enxeño, orientación e destreza.
Trátase por tanto dunha gymcana nocturna na que os participantes deberán superar ata dez probas diferentes, concluíndo cunha na praia, completando así unha ruta definida pola organización e superando unha serie de retos físicos e mentais ao longo da mesma.
A meta é finalizar o percorrido e superar o máximo número de desafíos que se expoñen nos puntos de control. Cada proba superada dará dereito ao equipo a un obxecto. O que consiga un maior número e complete o percorrido no menor tempo será o gañador deste primeiro Rastrexo en Sanxenxo.
Tanto Jesús Sueiro, concelleiro de Deportes, como Juan Pintos, presidente de O Cubreiro, animan aos veciños de Sanxenxo a gozar do espectáculo competitivo entre equipos que levará o desenvolvemento das diferentes probas, nas que os participantes deberán demostrar ademais grandes doses de humor.
A organización deste Rastrexo busca ofertar unha alternativa diferente de lecer en familia que ademais pode ser compartida polos espectadores, que talvez se animen a participar activamente na próxima edición.