Tres actividades para solidarizarse cos familiares e enfermos de Alzhéimer
Por Redacción
O 26 de agosto, AFAPO, a asociación de familiares de enfermos de Alzhéimer en Pontevedra organiza a súa cea benéfica para recadar fondos para as actividades deste colectivo. O evento será no Liceo Casino da Caeira e será presentada por Miguel García Ramírez, coa colaboración do Trío Rever e a actuación do cantautor Enrique Alvite. As entradas atópanse á venda na sede da asociación na rúa Curtidoira e no Liceo Casino.
Ademais, AFAPO organiza o 16 de setembro a súa gala benéfica no Auditorio do Centro Social de Afundación de Pontevedra. Esta cita contará coa actuación do cómico galego Luís Piedrahita que presentará "Por que os maiores constrúen as randeeiras sempre encima dun charco?".
O espectáculo comezará ás 21.00 horas e as entradas están dispoñibles na sede de Afapo ou tamén se poden adquirir a través de Servinova, ao prezo de 15 euros.
A asociación participará tamén ao día seguinte, sábado 17 de setembro, na marcha que organiza a Federación Alzhéimer Galicia. Trátase dunha camiñada solidaria en Santiago de Compostela, que se inicia ás 11.00 horas no Monte do Gozo e percorrerá un total de 4 quilómetros ata chegar ao Parque de Bonaval, onde se plantará unha árbore e colocarase unha placa no Espazo da Memoria, un recordo para todas aquelas persoas afectadas por demencias.