Os fortes ventos provocan a caída dunha árbore sobre un coche en Cambados
Por Redacción
Os fortes ventos do nordés rexistrados durante este martes 9 provocaron diversas incidencias nas Rías Baixas. As máis destacables producíanse en Cambados ao desprenderse unha árbore, que caeu encima dun vehículo aparcado neste termo municipal sen que se rexistrasen danos persoais. Tamén neste concello, o cableado sufría danos e un farol precipitábase ao chan no lugar de Santo, segundo información facilitada polos servizos de Emerxencias.
Por outra banda, o servizo do 112 sinala que dúas persoas resultaron feridas ao chocar dous vehículos que circulaban pola AG-41, no punto quilométrico 6, á altura do concello de Meis.
O accidente rexistrábase ao redor das 15.30 horas deste martes 9. Os bombeiros de Ribadumia achegáronse ata o lugar, alertados por 112 Galicia pero non foi precisa a súa intervención para excarcerar. Os dous feridos foron trasladados polo persoal sanitario a un centro hospitalario. Foron necesarios os traballos do persoal do servizo de mantemento de estrada.