Os socorristas rescatan dúas persoas na Lanzada
Por Redacción
Dúas persoas foron rescatadas este domingo na praia da Lanzada, na parte do Grove, polos socorristas de garda no areal.
O suceso ocorreu sobre as 19:00 horas, cando o CAE 112 Galicia recibiu a chamada dun particular alertando dos apuros que atravesaba un bañista. Ademais aseguraba que outras persoas que tentaban auxilialo tamén tiñan dificultades para saír da auga.
Aínda que se chegou a dar aviso a Salvamento Marítimo foron finalmente os socorristas, con axuda dunha embarcación, os que rescataron a dúas persoas.
Unha delas foi atendida no punto polo persoal sanitario, mentres a outra foi trasladada en ambulancia a un centro hospitalario, segundo informa o 112 Galicia.