Activan a alerta amarela por calor extrema na provincia
Por Redacción
A Dirección Xeral de Emerxencias e Interior de Galicia activou a alerta amarela por calor extrema na provincia de Pontevedra, unha alerta que sobe a nivel laranxa no Baixo Miño.
A temperatura máxima chegará este domingo 7 de agosto en Pontevedra e a maior parte das Rías Baixas ata os 37 graos, cunha mínima de 18 graos.
Durante o luns a situación manterase estable, con máximas que roldarán os 36 graos.
A alerta desactivarase previsiblemente o martes ao esperarse unha lixeira baixada das máximas, aínda que a situación será de sol e calor durante toda a semana con máximas que roldarán os 30 graos.
Ante este episodio de altas temperaturas, Emerxencias propuxo unha serie de recomendacións, especialmente para as persoas maiores, con discapacidade, menores de 5 anos, que tomen algunha medicación ou que realizan traballos fisicos ou deporte ao aire libre.
Estes consellos céntranse en limitar a exposición ao sol, permanecer en lugares protexidos do sol e ben ventilados, tomar comidas lixeiras e hidratarse, evitar o exercicio físico prolongado, vestirse adecuadamente e cubrir a cabeza para evitar golpes de calor.