Un de cada tres reparos levantados nas grandes cidades foron en Pontevedra
Por Alejandro Espiño
O Partido Popular volve poñer o foco na xestión económica do Concello. O seu portavoz, Jacobo Moreira, denunciou este venres o "alto grado" de incumprimentos das "obligaciones legales y de transparencia" do goberno municipal.
Así o sinala despois de que os populares repasaran a conta xeral do Concello do 2015. Nela, comprobaron que Pontevedra alcanzou a "escandalosa e inaceptable" cifra de 240 reparos formulados polo servizo de Intervención que foron levantados polo alcalde. Sinalan que un de cada tres reparos que fan os funcionarios das grandes cidades galegas son xa en Pontevedra.
Este "modus operandi" do BNG, segundo Moreira, ten a finalidade de "mantener su régimen clientelar y de nepotismo a través de contrataciones a dedo".
Entre os motivos dos reparos, o PP observa un importante crecemento no número de fraccionamentos de contrato, modalidade que permite evitar a aplicación de concursos públicos. No ultimo exercicio alcanzáronse os 45.
Ademais, Jacobo Moreira asegura que tanto o servizo de Intervención como o secretario do pleno alertaron xa nun informe do "excesivo" uso desta modalidade de contratación e da "opacidad" cos propios funcionarios "que tienen que convertirse en detectives para poder tener acceso a las facturas que se emiten".