O IMD concederá medio millón de euros en subvencións aos clubs deportivos pontevedreses
Por Redacción
A Xunta Reitora do Instituto Municipal de Deportes (IMD) aprobou abrir tres liñas de subvencións para apoiar con máis de 500.000 euros as actividades que realicen os distintos clubs e asociacións deportivas para o apoio á actividad deportiva.
As subvencións aprobáronse na última reunión do organismo autónomo, celebrada o venres 29 de xullo, co voto a favor dos representantes do grupo de goberno do BNG e dos clubs deportivos representados no IMD, pero coa abstención do resto de grupos políticos. Cabe lembrar que o IMD iniciou os trámites para a súa disolución, pero ata finais do presente ano 2016 seguirá con todos os seus servizos e liñas de traballo activas.
A primeira das liñas de subvencións achegadas reserva 300.000 euros para competicións oficiais para a tempada 2015-2016. A segunda irá detinada ás escolas deportivas, tanto 108.000 euros para programas de iniciación deportiva a impartir polos clubs como outros 24.000 euros para os centros escolares e para as actividades organizadas para persoas con discapacidade, maiores e persoas con dificultades económicas.
A terceira liña de subvencións que se aprobou o venres ten unha partida económica de 60.500 euros destinadas á organización e desenvolvemento de eventos deportivos.
INSPECCIÓN DAS TAXAS DE REDE DE SUMIDOIROS
O portavoz do goberno local, Raimundo González tamén anunciou que a Xunta de Goberno local deste luns aprobou adxudicar tres contratos, dous á empresa Laya e unha a E.C. Casas. A Laya adxudicóuselle un contrato de 27.000 euros para revisar as taxas de saneamento e lixo de oito parroquias do rural (Santa María e Santo André de Xeve, Bora, Marcón, Tomeza, Salcedo, Ponte Sampaio e A Canicouva) e outro de 34.683 euros para renumerar as vivendas familiares desas mesmas oito parroquias pontevedresas.
E.C. Casas foi a adxudicataria das obras para realizar no camiño que comunica a estación fitopatolóxica de O Areeiro e o Agro Vello, na parroquia de Lourizán. Por 84.000 euros a empresa terá que acometer a mellora do viario, aumentar o grosor do asfalto e construír 'lombos'.
Relacionadas:
-
O PP preguntará no Pleno polo atraso no pagamento das subvencións a clubs deportivos
Por Redacción |
-
O IMD deixa paso ao Servizo Municipal de Deportes
Por Redacción |
-
Vives no rural? É posible que a túa casa cambie de número nos próximos meses
Por Natalia Puga |
-
O Concello vixiará en oito puntos do rural os veciños que non pagan o recibo do lixo
Por Redacción |