Rescatan dous tripulantes dunha gamela que envorcou entre A Toxa e o porto do Grove
Por Redacción
Unha patrulleira do servizo marítimo da Garda Civil rescatou na tarde deste sábado dous tripulantes dunha embarcación tipo gamela que envorcou entre a Illa da Toxa e o porto do Grove.
Segundo a información facilitada polo Centro de Atención de Emerxencias de Galicia 112, as persoas foron rescatadas en perfecto estado, polo que non requiriron asistencia sanitaria. Foron levadas a porto sans e salvas por unha auxiliar da patrulleira da Garda Civil.
Todo ocorreu sobre as 18.00 horas. A primeira alerta deuna a propia Garda Civil, que alertou ao 112. Dende o centro de coordinación deuse aviso a Salvamento Marítimo, ao servizo de Gardacostas de Galicia e aos efectivos de Protección Civil do Grove.