Teatro, cinema europeo e música para dinamizar Portonovo
Por Redacción
Portonovo, o segundo núcleo poboacional de Sanxenxo en afluencia turística durante o verán, conta este ano cun programa especial de dinamización posto en marcha pola concellería de Cultura co obxectivo de ofrecer un amplo abano de actividades que potencien o lecer en familia e as actividades ao aire libre, á vez que busca descentralizar os escenarios das actuacións.
O programa inclúe por tanto tres ciclos monográficos que ofrecerán teatro, actuacións das agrupacións corais e Cinema de Comedia Europea, que ademais se complementarán con actividades específicas para un público infantil e talleres de cociña na Casa Mariñeira.
Todos os luns ata o 5 de setembro haberá unha película ao aire libre en clave de humor e producida en diferentes países europeos. A primeira proxección terá lugar o luns 1 de agosto coa película Un funeral de morte, de Reino Unido. Nas catro semanas posteriores poderán visualizarse Ocho apellidos catalanes, Mine Vaganti (Tengo algo que decirte), Bienvenido al Norte e Gato Negro, Gato Blanco.
Os martes ata o 6 de setembro haberá actuacións de corais. Os coros en actuar serán o de parroquial de San Esteban de Noalla e o parroquial de San Xinés de Padriñán. Tamén actuarán a Casa Mariñeira a Coral Polifónica Santa María Adina de Portonovo, o coro do Club de Xubilados de Portonovo, a Coral Polifónica Baiona a Real e o Coro Parroquial de Vilalonga.
Os mércores a proposta será o teatro, con obras no campo de San Roque. O ciclo comeza este mesmo mércores 27 de xullo con Eurovisón e terminará o 5 de setembro. As representacións previstas serán Miña Naiciña, do grupo de teatro Fonte da Tella de Soutomaior; O libro máxico, a cargo de Expresión Contacontos de Pontevedra; Petra y Justino, do grupo de teatro do Club de Xubilados de Sanxenxo e Unha avoa a catro patas, calcetíns en gravatas, escapa que ven a Paca, a cargo do grupo de teatro de Xubilados de Portonovo.
O programa presentado pola concelleira de Cultura, Sandra Fernández Agraso, inclúe o vindeiro venres, 5 de agosto un espectáculo aéreo de circo e malabares a cargo de Kanbahiota. Será a partir das 22.00 horas no Parque do Espiñeiro, en Portonovo.
O 12 de agosto o Parque do Espiñeiro acollerá a exhibición dun performance e malabares a cargo de Djuggledy.