O edil Roberto Carlos Agís pide que se garanta un acceso ao Outeiro, en Dorrón
Por Redacción
O concelleiro non adscrito do Concello de Sanxenxo, Roberto Carlos Agís, ven de presentar ao Pleno unha moción para habilitar un acceso ao Outeiro, na parroquia de Dorrón.
O concelleiro faise eco da petición dos veciños da zona que levan dende fai dous anos sen poder subir e baixar o Outeiro como facían antes, camiñando 20 metros e non 700 como agora.
Isto débese, segundo explica o concelleiro non adscrito, a que o acceso foi eliminado coas obras de reforma da carretera de Dorrón e a construcción dun muro de contención a cargo da Deputación de Pontevedra, "obra, por certo, paralizada".
A moción insta á Deputación "a que remate a obra o antes posible", xa que esta situación "non só é unha vergoña, senón que está a perxudicar os veciños" e pon en perigo a seguridade dos conductores e viandantes.
Ademáis Roberto Carlos Agís quere que o concello fale e negocie coa veciñanza a posibilidade dunha cesión ou compra dos terreos colindantes ou que están preto o antigo acceso, necesarios para a construcción dun acceso alternativo o Outeiro, e que se incorpore nos presupostos municipais a partida presupuestaria necesaria para levala a cabo.