Sanxenxo adxudica o acondicionamento dunha parcela para aparcar 200 coches en Portonovo
Por Redacción
O goberno local adxudicou á empresa COVSA o acondicionamento da parcela situada en Seame, Portonovo, para estacionamento de vehículos. Trátase dunha superficie municipal de equipamento público situada no PEI 3, concretamente na rúa Fariña Jamardo número 10.
Os traballos, que poderían comezar esta mesma semana, permitirán que a principios de agosto poida utilizarse esta zona como aparcadoiro para uns 200 vehículos.
A obra, que saíu a licitación por un importe de 60.464,53 euros IVE incluído, foi adxudicada por 49.967,88 euros e contempla a dotación de iluminación a toda a parcela, así como o valado perimetral da mesma, de forma temporal e como medida de seguridade.
Habilitarase tamén unha rampla de acceso para os vehículos.