A artesanía acode fiel á súa cita estival coa novena feira Chalana
Por Redacción
Creada e actualizada
Creada e actualizada
Non podía faltar a feira de artesanía Chalana dentro das propostas estivais na cidade. A feira organizada pola Asociación Deseño Atlántico afronta este ano a súa novena edición.
Un total de 16 artesáns exhibirán as súas creacións do 15 de xullo ao 7 de agosto na súa localización habitual, o Paseo Antonio Odriozola.
Artigos de coiro, téxtil, madeira, xoguetes, xoias, cerámica ou produtos realizados con mel son algunhas das propostas desta edición, na que se presentan cinco novos artesáns pero mantendo a idea de que "o 80% sexan galegos", sinalou na presentación Salvador Vázquez.
O horario dos postos será aproximado, de 12:00 a 14:00 horas polas mañás e de 18:30 a 23:00 horas polas tardes, en función do clima.
QUEIXAS DE CIDADÁNS
A instalación da feira no Paseo Antonio Odriozola, o mesmo lugar que nos últimos anos, derivou este ano en críticas de cidadáns que consideran que non é o emprazamento adecuado ao coincidir coa celebración do Festival de Jazz e Blues de Pontevedra, previsto para toda esta semana. Segundo aseguran, réstalle espazo aos potenciais espectadores dos concertos, pois algunhas das citas musicais congregan a un público numeroso que se verá privado de varios metros do Paseo para poder gozar das actuacións. Suxiren que se cambie a localización para posteriores convocatorias.