Vives no rural? É posible que a túa casa cambie de número nos próximos meses
Por Natalia Puga
Se vives nalgunha das parroquias do rural de Pontevedra, é posible que nos próximos meses teñas que actualizar a túa dirección. O Concello de Pontevedra contratará a actualización da numeración de oito parroquias, uns traballos que permitirán completar as tarefas xa realizadas recentemente en Lourizán, Lérez ou Campañó e renumerar o total das vivendas do rural pontevedrés.
Nas 15 parroquias do rural de Pontevedra hai ao redor de 8.000 vivendas e nesta fase de traballos que contratará o Concello actuarase en aproximamente a metade, todas as de Marcón, Bora, Salcedo, Tomeza, Ponte Sampaio, A Canicouva, Santo André de Xeve e Santa María de Xeve.
A Xunta de Goberno local aprobou este luns a contratación dos traballos, orzamentados en 36.515,04 euros e que terán seis meses de execución. Trátase dunha actuación necesaria porque nos últimos anos construíronse numerosas novas vivendas nestas zonas do municipio e "non había maneira de renumerar algunhas das casas" porque se optou por fórmulas como 1A e 1B ou 1A e 1 bis ou algunhas similares, pero xa se esgotaron e non era a opción máis recomendable en canto a organización.
EDIFICIO XUDICIAL DA PARDA
A Xunta de Goberno local tamén aprobou este luns a licenza para a construción do novo edificio xudicial da Parda. O procedemento estaba pendente de requisitos como, por exemplo, o pago da fianza e este luns, unha vez que a Vicepresidencia da Xunta comunicou que se cumpriron todos, concedeuse licenza. Superado este trámite, "podar iniciar os traballos cando teñan a ben".