Ponte Caldelas renova a rede de augas pluviais de Chaín
Por Redacción
Un total de 20.000 euros investiu o Concello de Ponte Caldelas nas obras de substitución da rede de augas pluviais no lugar de Chaín (A Insua). Con esta actuación, segundo o goberno municipal, soluciónase o problema das habituais filtracións nos baixos e garaxes das vivendas situadas a ambos lados da estrada.
As obras, que eran moi demandadas polos veciños dende hai tempo, quedan agora rematadas.
O antigo tubo, de fibrocemento, estaba completamente escachado polo paso de vehículos pesados, especialmente dos tractores. A mellora consistiu na instalación dunha moderna canalización de PVC, ben asentada sobre unha base de formigón, baixo o firme da pista.
"Era unha obra moi necesaria", recalcou o alcalde Andrés Díaz diante dos veciños, pois na primeira fase quedaron recollidas as augas dun pequeno regato canalizado na parte de arriba e agora quedou renovada toda a rede de pluviais na baixada, onde hai unhas 10 vivendas a ambas marxes e que padecían a entrada de auga durante os días de choiva.
O alcalde recalcou que o Concello vai cumprindo cos compromisos adquiridos cos veciños dos distintos lugares de Ponte Caldelas, conforme ás demandas recollidas nas asembleas mantidas ao comezo do mandato municipal.
A institución municipal traballa conforme a un plan no que están priorizadas de maior a menor urxencia coa intención de que en cada un dos núcleos habitados haxa, cando menos, unha actuación anual.