O goberno provincial aprobou iniciativas destinadas ao envellecemento activo, servizos sociais e emprendemento xuvenil
Por Redacción
A Xunta de Goberno da Deputación de Pontevedra celebrada este xoves aprobou iniciativas destinadas ao envellecemento activo, servizos sociais, emprendemento xuvenil e bolsas para estudantes, así como unha nova tanda de achegas ao Plan Concellos.
No primeiro dos casos o goberno provincial adxudicou á empresa Magnafor Qualitas, S.L. o programa Depo En Marcha, que inclúe 29 obradoiros dentro de oito grandes bloques: Traballando coas Mans (cestería, pintado de teas, reciclaxe ou arte floral), Entre fogóns (cociña galega, elaboración de conservas, licores, panadería, repostería, tapiñas ou petiscos), Aprendendo da Natureza (un obradoiro de plantas medicinais e outro de poda e tarefas de campo), Móvete (pilates, ioga, taichí, ximnasia de mantemento e zumba), Activando Corpo e Mente (conservación da memoria, musicoterapia, risoterapia ou control e manexo da ansiedade e o estrés), Dálle Marcha (bailes de salón, pandeireta e canto popular), Enredando (xogos tradicionais, teatro e fotografía) e En Rede (internet e correo electrónico, iniciación á informática e informática avanzada).
Pola súa banda, o plan de cofinanciamento dos servizos sociais comunitarios municipais en 2016 para os cincuenta e tres concellos da provincia de menos de 20.000 habitantes, conta cun importe global de 2.120.177,43 euros.
A finais de maio rematou o prazo para que os municipios presentasen as súas solicitudes para adherirse a este plan, polo que agora a Deputación lle dá o visto bo. Así mesmo, o goberno provincial aprobou o pagamento anticipado do 35% do importe das achegas concedidas aos concellos ao abeiro deste plan, en concreto, un total de 742.061,95 euros para os cincuenta e tres municipios.
Os concellos beneficiarios recibirán as correspondentes contías para costear dous tipos de gastos, os do persoal que atende os servizos municipais básicos municipais e os do servizo de axuda no fogar básico.
260.000 EUROS PARA EMPRENDEMENTO XUVENIL
A Xunta de Goberno tamén aprobou o proxecto DepoEMPRENDE, enmarcado no programa de emprendemento xuvenil da Fundación INCYDE e financiado polo Fondo Social Europeo, a través do cal se investirán preto de 260.000 euros para o impulso do emprendemento xuvenil entre 120 mozos da provincia, menores de 30 anos, rexistrados no Sistema Nacional de Garantía Xuvenil, sen ocupación e sen estar integrados nos sistemas de educación ou formación.
O goberno provincial tamén aprobou o proxecto Erasmus + Practicum Depo 2016 para o que a Dirección do Servizo Español para a Internacionalización da Educación (SEPIE) e a Deputación de Pontevedra investirán preto de 800.000 euros e no que participarán máis dun centenar de estudantes e cinco docentes de ciclos medios de formación profesional.
CEN MIL EUROS AO CONCELLO DE CUNTIS
A Xunta de Goberno da Deputación de Pontevedra tamén deu o visto bo a novas axudas para seis concellos da provincia, un deles o de Cuntis, para o que se aprobou unha contía de 100.000 euros para a realización de melloras en varios camiños do rural, cun grao de execución do Plan Concellos neste municipio que chega así ao 53%.