Morat e Luis Fonsi, grandes atractivos na I Gala solidaria Panorama contra o Párkinson
Por Redacción
Os máis novos teñen unha cita inescusable o próximo sábado 30 de xullo na praza do Porto Deportivo Juan Carlos I de Sanxenxo, no espazo da Praza do Mar, para ver en concerto a algúns dos máis coñecidos artistas da música española. Morat, Luís Fonsi, Edurne, Gemeliers, Diego Martín, Logia e Guillermo Castro subiranse ao escenario con motivo da celebración da I Gala Solidaria Panorama contra o Párkinson, un evento no que a recadación irá destinada á investigación desta enfermidade a través da Fundación Curemos o Párkinson.
Este xoves presentábase a gala coa presenza do alcalde de Sanxenxo, Gonzalo Pita e o director de Panorama, Lito Garrido. Os organizadores esperan congregar a 20.000 persoas nesta cita e as entradas xa se poden adquirir de forma anticipada na plataforma Ticketea, ao prezo de 10 euros. A adquisición en despacho de billetes será tres euros máis cara.
Ao mesmo tempo, abrirase unha Fila 0 por 5 euros para todas aquelas persoas que non poidan acudir ao evento e queiran colaborar coa Fundación Curemos o Párkinson.
O evento dará comezo ás 22.00 horas e finalizará ás 02.00 da madrugada. Catro horas de música en que Panorama estará acompañada no escenario por artistas que actualmente ocupan os primeiros postos nas listas de éxitos.