Comezan as prácticas dos alumnos da Escola Naval Militar
Por Redacción
Este domingo día 12 de xuño, o Buque de Asalto Anfibio 'Galicia' e o Patrulleiro de Altura 'Infanta Elena' teñen prevista a entrada na Ría de Pontevedra para recoller un continxente de alumnos da Escola Naval Militar de Marín. Os alumnos, a bordo dos buques, van realizar un cruceiro de instrución de catro semanas de duración, previsto nos seus plans de estudos, e que os levará a participar en exercicios nacionais e multinacionais.
Segundo informou a Dirección de Comunicación da Escola Naval, está previsto o embarque de 75 alumnos e acompañados de 5 profesores a bordo do 'Galicia' e de 12 alumnos e 1 profesor a bordo do patrulleiro 'Infanta Elena'. Estes buques preséntanse como dúas plataformas idóneas para a posta en práctica por parte dos alumnos dos coñecementos adquiridos durante o intenso curso escolar.
A agrupación ten previsto visitar durante o cruceiro os portos de Valencia, Cartaxena, Cádiz e Lisboa.
EMBARQUE DE VELEIROS-ESCOLA
Doutra banda, outros 22 alumnos e 6 profesores, partiron o sábado 11 a bordo das Goletas da Escola Naval 'Giralda', 'Peregrina' e 'Aguete', para realizar un periplo de catro semanas que os levará ata o Mediterráneo e onde se practicará a manobra e navegación a vela, elementos esenciais na formación dos futuros oficiais.
ALUMNOS DE INFANTERIA DE MARIÑA
Por último apuntar que o luns 13 de xuño, está previsto a saída dun continxente de 32 alumnos de Infantería de Mariña acompañados de 6 profesores, que teñen previsto a realización dun campamento de dúas semanas na Serra da Capelada (A Coruña) e no campo de manobras de Parga (Lugo), onde levarán a cabo exercicios de tiro, topográficos e tácticos.
Á finalización do campamento en Parga, os alumnos de Infantería de Mariña, incorporaranse ao embarque a bordo do 'Galicia' para completar as catro semanas de Instrución e Adestramento previstas.
Este período de final de curso é o colofón a un intenso ano escolar e ten un gran peso no plan de estudos e na formación militar, mariñeira e técnica dos alumnos. Por iso a Armada, recoñecendo a súa importancia, pon a disposición da Escola Naval un gran número de medios e persoal da frota, que contribúen desa forma á formación dos futuros cadros de mando da Armada.