A Fiscalía de Pontevedra pediu que 1.400 causas se declaren complexas ou se prorroguen
Por Redacción
Rematado o prazo de seis meses para a revisión dos procedementos que se están a instruír nos xulgados de Pontevedra ante a entrada en vigor do artigo 324 da Lei de Axuizamento Criminal, a Fiscalía Provincial solicitou que foran declaradas complexas ou se lle concedese unha prórroga ou prazo extraordinario un total de 1.409.
Nos seis meses transcorridos dende a entrada en vigor da nova lei, o pasado 6 de decembro ata o pasado 6 de xuño de 2016 os fiscais da provincia de Pontevedra revisaron mais de 5.000 procedementos, segundo os datos facilitados este venres polo fiscal superior de Galicia, Fernando Suanzes.
Suanzes realizou unha visita institucional ás instalacións da Fiscalía Provincial de Pontevedra nos xulgados da Parda e mantivo unha xuntanza co equipo do Ministerio Público e co fiscal xefe, Juan Carlos Aladro. Durante a reunión analizouse o proceso de revisión das causas.
O fiscal superior agradeceu e salientou o esforzo que están a realizar os 49 fiscais pontevedreses que ao esixente traballo diario que teñen nos xulgados engadiron a responsabilidade de afrontar o proceso aberto cos cambios normativos e de implantación das novas tecnoloxías. No ano 2015, atenderon 83.978 procedementos incoados nos xulgados, un 4,5% mais que o ano anterior, e redactaron preto de 5.000 escritos de cualificación.
Na reunión tamén se abordou o proceso de aplicación das novas tecnoloxías para axilizar a xestión diaria da Fiscalía. Un dos fitos mais importantes neste aspecto é o emprego dos sistemas telemáticos para a presentación de escritos e documentos e a realización de actos de comunicación procesual, regulados a través do sistema LexNET.
Ao respecto, desde a Fiscalía destacan que o sistema supón un novo modelo organizativo para lograr un exercicio mais eficaz e eficiente da labor do Ministerio Fiscal, pero a súa aplicación non está exenta de dificultades debido á coexistencia con programas e aplicacións previos, en cuxa compatibilidade se está a avanzar.