A Xuntanza Folk Follas de Olivar volve este sábado á Insua
Por Redacción
A segunda edición da Xuntanza Folk Follas de Olivar chega este sábado día 11 de xuño á Carreira Ancha de A Insua, da man da asociación de veciños da parroquia e do Concello de Ponte Caldelas. O programa festivo combina música, contos, xogos populares e gastronomía e desenvolverase a partir das 12.30 horas coas actuacións de 'Nós tamén imos' e 'Amoras maduras'.
Ás 14.30 horas haberá un xantar popular e quedará o campo libre para os músicos espontáneos que queiran demostrar as súas habilidades. Baixo a arboreda da Carreira Ancha haberá un bar e comida a prezos populares e tamén un posto de polbo.
Despois da comida, haberá tamén xogos tradicionais para nenos e maiores e, xa á tardiña, organizaranse contos musicados con Marcelo Dobode e unha escola de baile tradicional a cargo de Trouleadas de Ponte Caldelas, Os Xeitosos da Insua, Os Melidaos e Zurrumalla.
O alcalde de Ponte Caldelas, o socialista Andrés Díaz, e o concelleiro do BNG Manuel Barreiro mantiveron unha xuntanza coa directiva veciñal para pechar todos os detalles. O Concello, ademais do apoio económico e loxístico, rematou estes días a limpeza integral da zona e repuxo e amañou varios bancos que tiñan sido destrozados por accións vandálicas.
O alcalde asegura que este festival folk é todo un exemplo que demostra o dinamismo e o pulo do tecido veciñal caldelán. Gracias á iniciativa da asociación da Insua, Ponte Caldelas conta cun festival folk "cun ambiente magnífico e que aspira a ir crecendo pouco a pouco para converterse nunha referencia".