Un empresario acusado de alzamento de bens devolve o diñeiro e reduce a súa condena de seis a un ano de prisión
Por Redacción
O empresario do Salnés Eladio D.S., administrador único de M.B. SL, sentou este martes no banco dos acusados da Audiencia Provincial de Pontevedra para render contas por un delito de alzamento de bens que cometeu ao levar a cabo o alleamento dunha nave industrial mediante contrato privado aínda sabendo que tiña unha débeda coa Seguridade Social. Un acordo previo coa Fiscalía e devolver o diñeiro permitiulle reducir substancialmente a pena final á que foi condenado, de seis anos de prisión a un.
O acusado recoñeceuse autor dos feitos e conformouse coa pena que lle pedía o fiscal do caso, David de la Fuente, tras modificar o seu escrito de acusación inicial e aplicarlle a circunstancia atenuante de reparación de dano.
Así, coa súa conformidade, a sentenza condenatoria da Sección Cuarta da Audiencia inclúe un ano de prisión e o pago dunha multa de 2.160 euros, 12 meses a razón de seis euros diarios e, ademais, as partes acordaron a suspensión da pena, de tal modo que evitará o ingreso en prisión a condición de que non delinca en dous anos.
O delito polo que o condenaron cometeuno, segundo o fiscal, con pleno coñecemento da débeda contraída pola empresa coa Seguridade Social e da falta de pagamento consecuente, en prexuízo dos seus acredores e coa finalidade de evitar o pago aos mesmos. A nave que vendeu está situada no polígono industrial do Salnés.
O acusado realizou o alleamento impedindo a eficacia do embargo e por tanto alzándose cos seus bens en prexuízo da súa acredora, a Tesourería Xeral da Seguridade Social. A empresa foi declarada en concurso no ano 2012 cunha débeda coa Tesourería Xeral da Seguridade Social de 106.360,63 euros, pero descoñécese o importe da débeda no momento do alleamento.