As prazas de Sanxenxo prepáranse para o verán
Por Redacción
O verán está ao virar a esquina e, con el, a tempada alta en concellos turísticos como Sanxenxo. Para prepararse para a súa chegada, a Concellería de Servizos, que dirixe Maximino González, comezou un operativo de limpeza en espazos públicos co obxectivo de que presenten un mellor aspecto de fronte ao comezo da nova campaña.
Tras a execución dos traballos de limpeza na Praza Quinteiro, os operarios municipais atópanse estes días na Praza do Pazo, onde xa procederon a realizar unha limpeza a presión de toda a superficie, que acumulaba sucidade sobre todo nas zonas máis sombrías.
A maiores, nesta praza procederase á limpeza das macetas de formigón que decoran o centro desta praza, para o seu posterior pintado, e ao pintado dos bancos situados no perímetro.
En Sanxenxo, queda pendente unha actuación similar na praza de Fonte de Ramo e, cando terminen, os operarios dirixiranse a Portonovo, onde o operativo comezará no Campo de San Roque, limpando a coñecida rúa dos viños, para ir avanzando cara a outros espazos públicos do centro urbano de Portonovo.