As obras de rehabilitación na estrada N-640 deixan cortes de tráfico toda a semana
Por Redacción
O tráfico pola estrada N-640 ao seu paso por Vilagarcía de Arousa verase afectado durante toda a semana con motivo das obras de rehabilitación do firme que realizará o Ministerio de Fomento.
As obras realizaranse entre os puntos quilométricos 223,380 e 238,700, isto é, na travesía de Vilagarcía de Arousa e consistirán nun estendido de microaglomerado en frío para mellorar as características superficiais do firme, e na posterior reposición de marcas viarias.
Os traballos executaranse a partir deste martes e produciranse afeccións ao tráfico con pasos alternativos de vehículos, segundo informou este luns o Ministerio.
Con estes traballos concluiranse as obras de rehabilitación do firme da travesía de Vilagarcía de Arousa que realizou o Ministerio de Fomento cun orzamento de 215.551 euros.